M.N.R NEWSPAPER

ផ្ទុះគ្រាប់បែកនៅប៉ោយប៉ែតបណ្ដាលឲ្យស្ត្រី២នាក់រងរបួស

3:25 AM

ស្ត្រីពីររូបបានរងរបួសក្នុងហេតុការណ៍ផ្ទុះគ្រាប់បែកមួយ នៅកណ្ដាលក្រុងប៉ោយប៉ែត កាលពីយប់ថ្ងៃទី២៣ ខែវិច្ឆិកា ឆ្នាំ២០១១។ ស្ត្រីរងគ្រោះទាំងពីរនាក់នោះត្រូវបានក្រុមអាជ្ញាធរបញ្ជូនទៅ សង្គ្រោះនៅមន្ទីរពេទ្យ ខេត្តស្រះកែវ ប្រទេសថៃ។ លោក អ៊ុំ សុផល អធិការនគរបាលក្រុងប៉ោយប៉ែត បានថ្លែងនៅថ្ងៃព្រហស្បតិ៍ ទី២៤ ខែវិច្ឆិកា ថា គ្រាប់បែកនោះត្រូវបានជនមិនស្គាល់មុខលួចយកទៅដាក់បង្កៃនៅទ្វារ ចេញចូលរបស់មន្ត្រីប៉ូលិសអន្តោប្រវេសន៍ ស្ថិតនៅភូមិបាលិលេយ្យ សង្កាត់ប៉ោយប៉ែត ក្រុងប៉ោយប៉ែត ហើយបានផ្ទុះកាលពីវេលាម៉ោងជាង ៨យប់។ ប៉ូលិសសន្និដ្ឋានជាបឋមថា ការលួចបង្កៃគ្រាប់បែកនេះ គឺជារឿងគំនុំ។ ប្រភពបានឲ្យដឹងថា មន្ត្រីប៉ូលិសរូបនោះមានឋានៈជានាយរងប៉ុស្តិ៍នគរបាលអន្តោប្រវេសន៍ ច្រកទ្វារអន្តរជាតិប៉ោយប៉ែត។ ភរិយាមន្ត្រីប៉ូលិសរូបនេះមានឈ្មោះ គង់ វិច្ឆិកា មានផ្ទៃពោះ ៦ខែ និងស្ត្រីជាអ្នកបម្រើម្នាក់ទៀតបានរងរបួសធ្ងន់។ គ្រាប់បែកបានផ្ទុះឡើយនៅពេលស្ត្រីជាប្រពន្ធ និងអ្នកបម្រើទាំងពីរនាក់បានចេញពីក្នុងផ្ទះទៅបើកទ្វារឲ្យប្ដី បើកឡានចូលក្នុងផ្ទះ។ លោក ស៊ុំ ចន្ទគា ប្រធានសម្របសម្រួលនៃសមាគមអាដហុក បានសម្ដែងការព្រួយបារម្ភ និងទាមទារឲ្យអាជ្ញាធរមានសមត្ថកិច្ចតាមចាប់ជនលួចបង្កៃគ្រាប់បែក នោះយកទៅផ្ដន្ទាទោសតាមច្បាប់៕

Read more »

ខៀវ សំផន៖ ហេតុអីតុលាការមិនកាត់ក្ដីព្រះមហាវីរក្សត្រ នរោត្ដម សីហនុ?

3:19 AM

No comments

សវនាការបឋមបើកការចោទប្រកាន់របស់សាលាក្ដីខ្មែរក្រហម នៅថ្ងៃទី ២៣ ខែវិច្ឆិកានេះ ជនជាប់ចោទ ខៀវ សំផន បានចោទជាសំណួរថា ហេតុដូចម្ដេចបានតុលាការខ្មែរក្រហម មិនយាងអតីតព្រះមហាវីរក្សត្រសម្ដេចព្រះ នរោត្ដម សីហនុ មកជំនុំជម្រះជាមួយគាត់។ការថ្លែងរបស់ជនជាប់ចោទ ខៀវ សំផន គឺធ្វើឡើងនៅក្នុងសេចក្ដីសន្និដ្ឋានការពារខ្លួនរបស់គាត់ឆ្លើយតប ទៅហ្នឹងសេចក្ដីសន្និដ្ឋានបើកការចោទប្រកាន់របស់សហព្រះរាជអាជ្ញា រយៈពេលពីរថ្ងៃកន្លងមកនេះ។ សំឡេង៖ «លោកហាក់ដូចជាគិតថា ខ្ញុំនិយាយយ៉ាងនេះមិនត្រូវទេ។ បើដូច្នេះ ហេតុអ្វីបានជាលោកមិនកោះយាងសម្ដេច ឱ្យលោកមកអង្គុយកៅអីចុងចោទជាមួយយើងខ្ញុំផងទៅ»។ ជនជាប់ចោទ ខៀវ សំផន បានការពារថា ភាពឆ្វេងនិយមរបស់គាត់ គឺជាការប្រឆាំងនឹងពួកមន្ត្រីរបស់លោក លន់ នល់ ដែលរៀបចំធ្វើរដ្ឋប្រហារទម្លាក់សម្ដេចព្រះ នរោត្ដម សីហនុ ក្នុងឆ្នាំ ១៩៦៩។ ជនជាប់ចោទបន្តថា សហព្រះរាជអាជ្ញាលើកឡើងតែរឿងពីឆ្នាំ ១៩៧៥ ដល់ ១៩៧៩ ហើយបំភ្លេចចោលរឿងរ៉ាវមុនឆ្នាំ ១៩៧៥ ទេ រាប់ទាំងការទំលាក់គ្រាប់បែករបស់សហរដ្ឋអាមេរិក និងមហន្តរាយដល់អាយុជីវិតពលរដ្ឋកម្ពុជាផង។ លោក ខៀវ សំផន ថា គាត់ជាអ្នកជួយឱ្យមានការរួបរួមកម្លាំងជាតិ ដើម្បីការពារមាតុភូមិកម្ពុជា ដែលវៀតណាមតែងតែបញ្ចូលទៅក្នុងសហព័ន្ធឥណ្ឌូចិន។ ជនជាប់ចោទថ្លែងទៀតថា អ្វីដែលសហព្រះរាជអាជ្ញាចោទគាត់ កាលពីថ្ងៃ និងថ្ងៃអង្គារ គឺមានភាពលំអៀងខ្លាំងណាស់ ហើយចាត់ទុកថា ជាការឡើងគ្មានអ្វីច្បាស់លាស់សោះ។ ជនជាប់ចោទ ខៀវ សំផន អតីតប្រធានគណៈប្រធានរដ្ឋនៃរបបកម្ពុជាប្រជាធិបតេយ្យ គឺបានបន្តថា គាត់មិនសូវយល់ដឹងអំពីនីតិវិធីនៃសាលាក្ដីនេះទេ ដោយសារតែសាលាក្ដីខ្មែរក្រហម រៀបចំនីតិវិធីអ្វីៗ សម្រាប់តែសម្រួលដល់ខ្លួនឯងតែប៉ុណ្ណោះក្នុងរឿងក្ដីនេះ។ ជនជាប់ចោទ ខៀវ សំផន ថ្លែងថា ក្នុងនាមជាអង្គជំនុំជម្រះវិសាមញ្ញ គឺការធ្វើអ្វីៗ ផ្អែកលើភស្តុតាង។ ក៏ប៉ុន្តែ សវនាការរយៈពេលពីរថ្ងៃកន្លងមកនេះ មិនដូចការគិតទុករបស់គាត់ទេ។ សំឡេង៖ «អស់ រយៈពេលពីរថ្ងៃនេះ ខ្ញុំមានអារម្មណ៍ថា វាខុសពីសេចក្ដីរំពឹងរបស់ខ្ញុំ។ នៅពេលចាប់ផ្ដើមសវនាការនោះ ខ្ញុំយល់ឃើញថា សហព្រះរាជអាជ្ញាបានត្រឹមតែធ្វើការចោទប្រកាន់ដោយស្មានៗ ការអះអាងដោយគ្មានភស្តុតាង និងផ្សាំរឿងនេះបន្តិច រឿងនោះបន្តិចតែប៉ុណ្ណោះ»។ ការថ្លែងបកទៅសហព្រះរាជអាជ្ញាដូច្នេះ គឺមិនខុសគ្នាប៉ុន្មានទេ ពីជនជាប់ចោទ នួន ជា ដែលថ្លែងកាលពីថ្ងៃទី ២២ វិច្ឆិកាថា តុលាការខ្មែរក្រហមមិនយុត្តិធម៌សម្រាប់គាត់។ ជនជាប់ចោទ ខៀវ សំផន ក្នុងវ័យ ៨០ ឆ្នាំ ថ្លែងបន្តថា គាត់មិនដឹងថា ត្រូវឆ្លើយតបសហព្រះរាជអាជ្ញា ជា លាង ដូចម្ដេចទេ ពីព្រោះតែការផ្ដល់សក្ខីកម្ម សុទ្ធតែមិនបញ្ចេញឈ្មោះ ហើយភាគច្រើនដកស្រង់ចេញពីសៀវភៅ និងអត្ថបទកាសែត ដែលអ្នកនិពន្ធទាំងនោះ មិនមែនជាចៅស៊ើបអង្កេតដោយគ្មានលំអៀង។ ជនជាប់ចោទ បដិសេធរាល់ការចោទប្រកាន់របស់សហព្រះរាជអាជ្ញា ដោយថ្លែងថា គាត់មិនមែនជាសមាជិករបស់គណៈអចិន្ត្រៃយ៍របស់បក្សកុម្មុយនិស្ត កម្ពុជាទេ ព្រោះមិនឯកសារបញ្ជាក់ច្បាស់ ក្រៅពីកំណត់ហេតុប្រជុំ។ ជនជាប់ចោទបន្តទៀតថា គាត់មិនមែនប្រធានគណៈនយោបាយ ៨៧០ ហើយមិនជាប់ជំពាក់រឿងឧក្រិដ្ឋទាំងនោះទេ។ ទាក់ទងនឹងតួនាទីរបស់គាត់ជាប្រធានរដ្ឋគណៈប្រធានរដ្ឋ គឺគ្រាន់តែជាការតាំងឱ្យល្អមើលប៉ុណ្ណោះ គ្មានរូបរាងពិតប្រាកដទេ។ គាត់បានចំណោទមួទៀត៖ «ការដែលខ្ញុំ ត្រូវបានតែងតាំងជាប្រធានគណៈប្រធានរដ្ឋនៃរបបកម្ពុជា ប្រជាធិបតេយ្យនោះ នាំឱ្យខ្ញុំឋិតនៅក្នុងសហឧក្រិដ្ឋកម្មរួម។ បើអ៊ីចឹង ហេតុដូចម្ដេចបានជាលោកមិនធ្វើការចោទប្រកាន់លើមហាវីរក្សត្រ នរោត្ដម សីហនុ ដែរទៅ?»។ បើទោះជាជនជាប់ចោទព្យាយាមភ្ជាប់ព្រះមហាវីរក្សត្រ ព្រះ នរោត្ដម សីហនុ ដូច្នេះក្ដី ក៏ច្បាប់រដ្ឋធម្មនុញ្ញបានចែងការពារមិនឱ្យប៉ះពាល់ព្រះអង្គបានឡើយ។ ប្រធានអង្គជំនុំជម្រះសាលាដំបូង លោក និល ណុន ប្រកាសដល់ភាគីពាក់ព័ន្ធ និងសាធារណជនថា សវនាការពិភាក្សាពិនិត្យដេញដោលលើភស្តុតាងក្នុងសំណុំរឿងលេខ ០០២ នេះ សាលាដំបូងគ្រោងធ្វើនៅថ្ងៃទី ៥ ខែធ្នូ ឆ្នាំ ២០១១ ចាប់ផ្ដើមពីម៉ោង ៩ ព្រឹកតទៅ៕

Read more »

សិស្សសាលាជាង ១០០ នាក់បានដួលសន្លប់ភ្លាម

4:53 AM

No comments

គ្រូពេទ្យនៃមន្ទីរពេទ្យបង្អែកស្រុកចម្ការលើ ខេត្តកំពង់ចាម បានឲ្យដឹងថា សិស្សវិទ្យាល័យបុសខ្នុរចំនួន ១១២ នាក់ ត្រូវគ្រូពេទ្យជួយសង្គ្រោះបន្ទាប់ពីពួកគេដួលសន្លប់ ពេលកំពុងឈរគោរពទង់ជាតិ នៅព្រឹកថ្ងៃចន្ទ ទី ២៤ ខែតុលា ឆ្នាំ ២០១១។

លោកអនុបណ្ឌិត ជិន វិបុល អនុប្រធានមន្ទីរពេទ្យបង្អែកស្រុកចម្ការលើ ខេត្តកំពង់ចាម។ លោកមានប្រសាសន៍ថា មន្ទីរពេទ្យលោក បន្ទាប់ពីបានទទួលដំណឹងពីការដួលសន្លប់ភ្លាម ក៏បានបញ្ជូនរថយន្តទៅដឹកអ្នកជំងឺដល់ទីកើតហេតុ ដើម្បីជួយសង្គ្រោះបន្ទាន់។

លោកបន្តថា អ្នកជំងឺភាគច្រើនមានសភាពធ្ងន់ធ្ងរ និងត្រូវការអុកស៊ីហ្សែនសម្រាប់ជំនួយដកដង្ហើម។ ប៉ុន្តែ លោកថា មិនមានអ្នកជំងឺណាម្នាក់រងគ្រោះដល់អាយុជីវិតនោះទេ ព្រោះពេទ្យជួយសង្គ្រោះទាន់ពេល។

ទោះយ៉ាងណា លោកគ្រូពេទ្យ មិនទាន់ឲ្យដឹងពីមូលហេតុនាំឲ្យសិស្សដួលសន្លប់មកពីអ្វីនោះទេ ដោយបញ្ជាក់ថា គ្រូពេទ្យជំនាញកំពុងពិនិត្យតាមដានរកមូលហេតុពិតប្រាកដ។

ទាក់ទងនឹងបញ្ហានេះ លោកស្រី ស៊ឹម គឹមសាយ រស់នៅភូមិសាមគ្គី ឃុំបុស្សខ្នុរ ស្រុកចម្ការលើ ខេត្តកំពង់ចាម។ លោកស្រីឲ្យដឹងថា កូនស្រីរបស់គាត់ឈ្មោះ ម៉ុង ចាន់ឌី រៀនថ្នាក់ទី ១០ នៃវិទ្យាល័យបុសខ្នុរ ក៏បានដួលសន្លប់ដូចសិស្សដទៃទៀត ហើយគ្រូពេទ្យនៃមន្ទីរពេទ្យបង្អែកស្រុកចម្ការលើកំពុងជួយសង្គ្រោះ។

លោកស្រីបន្តថា កូនស្រីគាត់ពេលចេញពីផ្ទះមកសាលារៀន មានសុខភាពល្អទេ។ ក៏ប៉ុន្តែ មិនដឹងមូលហេតុអ្វី បានជាមកដល់សាលាមានអាការៈទន់ដៃទន់ជើង និងដួលសន្លប់ទៅវិញ។

អាណាព្យាបាលម្នាក់ទៀត ក៏បានឲ្យដឹងដែរថា កូនស្រីគាត់មិនធ្លាប់ឈឺទេពីមុនមក ហើយមុនពេលមកសាលារៀន ក៏មានសុខភាពល្អ។ ក៏ប៉ុន្តែ លោកឆ្ងល់ថា មូលហេតុអីបានជាមកដល់សាលាដួលសន្លប់បែបនេះ។

លោក ជួន ធារិទ្ធិ ជាសមាជិកក្រុមប្រឹក្សាស្រុកចម្ការលើ ខេត្តកំពង់ចាម ដែលបានតាមដានករណីសិស្សដួលសន្លប់ដល់មន្ទីរពេទ្យ នៅព្រឹកថ្ងៃចន្ទ ទី២៤ ខែតុលា។ លោកឲ្យដឹងពីអាការៈសិស្សដួលសន្លប់មានសភាពហេវហត់ ទន់ដៃទន់ជើង និងមានក្អួតចង្អោរ។

ទោះជាយ៉ាងនេះក្ដី មន្ត្រីមន្ទីរពេទ្យបង្អែកស្រុកចម្ការលើ បានអះអាងថា មកដល់រសៀលថ្ងៃចន្ទ ទី២៤ ខែតុលា មិនមានអ្នកជំងឺណាម្នាក់រងគ្រោះដល់ជីវិតទេ។ មន្ត្រីដដែលបន្តថា ករណីសិស្សវិទ្យាល័យបុសខ្នុរដួលសន្លប់នេះ ក្រុមគ្រូពេទ្យកំពុងពិនិត្យ និងព្យាបាលដោយយកចិត្តទុកដាក់។

មិនមានប្រភពណាមួយហ៊ានអះអាងលើករណីសិស្សវិទ្យាល័យបុសខ្នុរ ខេត្តកំពង់ចាមដួលសន្លប់នេះទេ។ ក៏ប៉ុន្តែ មានយុវជនខ្លះ បានឱ្យដឹងថា ដើមហេតុនាំឲ្យសិស្សដួលសន្លប់ អាចបណ្ដាលមកពីថ្នាក់ដឹកនាំសាលា បានដាក់ពិន័យឱ្យសិស្សទាំងនោះឈរមុខដងទង់ជាតិក្រោមកម្ដៅថ្ងៃរយៈ ពេលយូរ ជាការពិន័យដល់សិស្ស ដែលខ្ជិលច្រអូសមិនចង់តម្រង់ជួរគោរពទង់ជាតិ។

ទោះជាយ៉ាងណាក្ដី វិទ្យុអាស៊ីសេរី មិនអាចទាក់ទងលោកនាយកវិទ្យាល័យបុសខ្នុរ ដើម្បីបំភ្លឺជុំវិញករណីសិស្សដួលសន្លប់នេះបានទេ នៅរសៀលថ្ងៃចន្ទ ទី២៤ ខែតុលា ឆ្នាំ ២០១១៕

Read more »

Posted in: ព័ត៌មាន

មេបញ្ជាការកងអង្គរក្សលោក ជា ស៊ីម ត្រូវចាប់ខ្លួន

1:26 AM

No comments

កម្លាំងកងរាជអាវុធហត្ថរាជធានីភ្នំពេញបានដឹកនាំកម្លាំងចុះចាប់ខ្លួនអតីតមេបញ្ជាការកងអង្គរក្សលោក ជា ស៊ីម ឈ្មោះ ឈឿន ចាន់ថន ផ្កាយ៣ និងកូនចៅ ៣នាក់ទៀត នៅព្រឹកថ្ងៃសៅរ៍ ទី១៣ សីហា ស្ថិតនៅផ្ទះលេខ៦៥ ផ្លូវ៩៥ សង្កាត់បឹងកេងកង៣ ខណ្ឌចម្ការមន រាជធានីភ្នំពេញ។

មេបញ្ជាការរងកងរាជអាវុធហត្ថរាជធានីភ្នំពេញ លោក ពង្ស សាវរិទ្ធ បានមានប្រសាសន៍ថា ឥឡូវនេះអ្នកទាំង៤នាក់ គេបញ្ជូនទៅឃុំខ្លួននៅទីស្នាក់ការកងរាជអាវុធហត្ថរាជធានី។

លោក ពង្ស សាវរិទ្ធ បានបញ្ជាក់ថា ការចាប់ខ្លួននេះ តាមដីការបស់ព្រះរាជអាជ្ញារងរាជធានីភ្នំពេញ ប៉ុន្តែលោកមិនទាន់បញ្ជាក់ច្បាស់លាស់នៅឡើយ អំពីមូលហេតុនៃការចាប់ខ្លួន ថាពាក់ព័ន្ធទៅនឹងរឿងអ្វីនោះទេ៕ដកស្រង់ពីវិទ្យុអាស៊ីសេរី

Read more »

Posted in: ព័ត៌មាន

ក្រុមយុវសិស្សសារទរចំពោះការចុះផ្សាយទង្វើរបស់លោក គឹម ស្រូយ នៃកាសែតវិទ្យាសាស្ត្រខ្មែរ

6:38 PM

No comments

បន្ទាយមានជ័យ៖ វិទ្យាសាស្ត្រខ្មែរបានធ្វើការចុះផ្សាយអំពីទង្វើរបស់ លោក គឹម ស្រូយ នាយកវិទ្យា ល័យសម្តេចឪ ទាក់ទិនទៅលើការគ្រប់គ្រងក៏ដូចទទួលសំណូកពីសិស្សឬអាណាព្យាបាល រួចម្តងមកហើយ ។ ហើយមានក្រុមយុវសិស្សដែលធ្លាប់រៀននៅវិទ្យាល័យសម្តេចឪនេះបាននាំគ្នាសារទរ ហើយបានស្នើរវិទ្យា សាស្ត្រខ្មែរធ្វើការផ្សាយបន្តទៀត។ ថ្វីត្បិតតែកាសែតវិទ្យាសាស្ត្រខ្មែរលេខ១១៥ចេញថ្ងៃទី ២ ខែ សីហា ឆ្នាំ ២០១១ត្រូវបានគេប្រមូលទិញដើម្បីបិទព័ត៌មានក្នុងខេត្ត បន្ទាយមានជ័យយ៉ាងណាក៏ដោយ ក៏នៅតែមានយុវ សិស្សមួយចំនួនធំ ដែលធ្លាប់សិក្សានៅវិទ្យាល័យនេះ ហើយផ្លាស់ទៅបន្តការសិក្សានៅតាម បណ្តាខេត្ត-រាជធានីមួយចំនួន បានឃើញនូវការចេញផ្សាយដឹងអំពីទង្វើរបស់លោក គឹម ស្រួយ បាននាំគ្នាសារទរ និងសហប្រតិបត្តការក្នុងការផ្តល់ព័ត៌មានឲ្យវិទ្យាសាស្ត្រខ្មែរ ទាក់ទងទង្វើរបស់លោក គឹម ស្រួយ ជានិច្ច ។
ប្រភពព័ត៌មានពីប្រជាយុវសិស្សដែលធ្លាប់បានសិក្សានៅវិទ្យាល័យសម្តេចឪ ហើយបច្ចុប្បន្នកំពុងបន្ត សិក្សា នៅរាជធានីភ្នំពេញបានថ្លែងប្រាប់វិទ្យាសាស្ត្រខ្មែរតាមទូរស័ព្ទឲ្យដឹងនៅថ្ងៃទី៦ ខែ សីហា ឆ្នាំ ២០១១ ថា៖ ប្អូនសប្បាយចិត្តណាស់នៅដែលឃើញវិទ្យាសាស្ត្រខ្មែរចុះផ្សាយអំពីទង្វើរបស់ លោកនាយក គឹម ស្រួយ នេះ។ ប្អូនៗបានទទួលស្គាល់ថា កន្លងមកនេះលោក គឹម ស្រួយ ពិតជាបាន ធ្វើនូវទង្វើដូចដែលវិទ្យាសាស្ត្រ ខ្មែរចុះផ្សាយពិតមែន ។ ជាការពិតណាស់ដូចអ្វីដែលវិទ្យាសាស្ត្រខ្មែរធ្លាប់បានចេញផ្សាយកាលពីលេខ មុនអញ្ចឹង ដែលភ្នាក់ងាររបស់យើងបានទទួលព័ត៌មានពីសិស្សសាលាទាក់ទងនិងលោក គឹម ស្រួយ ហ៊ាន ប្រព្រឹត្តបទល្មើសទទួលសំណូកពីអាណាព្យាបាលសិស្សក៏ដូចជាសិស្សជាដើម ក្នុងការទិញពិន្ទុជាថ្ងូរនឹងការ ជាប់ចំណាត់ល្អៗ ។ ហើយនៅពេលដែលឆមាសមកដល់មិនថា លើកទី១ឬទី២ឡើយគឺធ្លាប់មានសិស្សមួយ ចំនួនផងដែរបានដើរPromotion ឲ្យលោក គឹម ស្រូយ ក្នុង ការទិញពិន្ទុនេះ គ្រាន់តែសិស្សានុសិស្សទាំងអស់ ចំណាយលុយដប់ម៉ឺនរៀលដែលស្មើនិង២៥ដុល្លា ប៉ុណ្ណោះ នោះនឹងបានពិន្ទុខ្ពស់លើសសិស្សពូកែ ក្នុងសាលា ហើយ ប៉ុន្តែពិន្ទុដែលទិញពីលោកនាយករូបនេះមិនត្រូវបាន បិទឲ្យឃើញនោះទេ គឺមានន័យថា ពិន្ទុដែល ទិញគឺត្រូវបានបញ្ជូនទៅមន្ទីរ ឯពិន្ទុដែលជាសមត្ថភាពរបស់ខ្លួន គឺបិទដើម្បីឲ្យគេមើលឃើញទាំងអស់គ្នា ។ ហើយក៏មានអ្នកមាត់ដាច់មួយចំនួនបាននិយាយថា ក្រោយពីចេញ លិទ្ធផលបិទប្រកាសនោះ គឺលោក គឹម ស្រូយ បានទុកឱកាសឲ្យសិស្សានុសិ្សទាំងអស់សម្រាប់តវ៉ា ដោយប្រការណាមួយមានភាពច្រឡំឬមិនប្រក្រតី តែផ្ទុយទៅវិញពួកអ្នកមាត់ដាច់បាន គិតថាការទុកឱកាស នេះគឺសម្រាប់លក់ពិន្ទុឲ្យសិស្សណាដែលមាន ចំណាត់ថ្នាក់ខ្សោយឬក៏ធ្លាក់។ មួយវិញទៀតមានប្រជាយុវសិស្សក៏ដូចប្រជាពលរដ្ឋដែលរស់នៅក្នុងដឹកដីខេត្ត បន្ទាយមានជ័យជាច្រើននាក់បានងឿងឆ្ងល់ចំពោះសិស្សនារីម្នាក់ទើបតែរៀនថ្នាក់ទី១១នៃវិទ្យាល័យសម្តេចឪ សោះ ស្រាប់តែដល់ថ្ងៃប្រឡងសញ្ញាបត្រទុតិយភូមិកាលពីថ្ងៃទី ២៥ ខែ កក្កដា ឆ្នាំ ២០១១ កន្លងទៅនេះ ឃើញសិស្សនារីនោះមានឈ្មោះនិងមុខប្រឡងនៅមណ្ឌលវិទ្យាល័យសិរីសោភ័ណដែរ ។ នេះប្រហែលជា មានការទទួលសំណូកពីសិស្សឬអាណាព្យាបាលសិស្សម្នាក់នោះហើយ បានជាលោកហ៊ានធ្វើទង្វើដែល័័ ប្រាស់ចាកពីក្រមសីលធម៌ជាអ្នកដឹកនាំនិងជាអ្នកដែលយកគំរូរតាមទៅវិញ ។ ដ្បិតអីកាសែតវិទ្យាសាស្ត្រខ្មែរ ក្នុងខេត្តបន្ទាយមានជ័យត្រូវបានគេប្រមូលទិញដើម្បីព័ត៌មានក៏ពិតមែន តែក៏នៅមានតាមបណ្តាលខេត្តនានា គេបានឃើញដែរ ជាពិសេសនោះគឺរាជធានីភ្នំពេញតែម្តង ហើយប្រជាយុវសិស្សមានក្តីសង្ឃឹមថា កាលពីលេខ មុនអង្គភាពប្រឆាំងអំពើពុករលួយក៏ដូចសមាគមគ្រូបង្រៀនកម្ពុជាឯករាជ្យបានទទួលជ្រាបហើយនឹងធ្វើការ ស៊ើបជាមិនខាន ៕

Read more »

Posted in: ព័ត៌មាន

កំនរសម្រាមមួយកន្លែងកំពុងធ្វើប្រជាពលរដ្ឋឈឺក្បាល

12:58 AM

No comments

បន្ទាយមានជ័យ៖ ប្រជាពលរដ្ឋដែលរស់នៅតាមបណ្តោយផ្លូវលេខ២ ស្ថិតនៅភូមិ កំពង់ស្វាយ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ កំពុងតែរអ៊ួរទាំចំពោះអាជ្ញាធរថា គ្មាន យកចិត្តទុកដាក់ក្នុងការថែរក្សាបរិស្ថាន ដែលបណ្តាលឲ្យក្រុមអាជីវករក៏ដូចប្រជាពលរដ្ឋមួយចំនួនយក កាកសំណល់ដែលសេសសល់ទៅចោលពាសវាលពាសកាលគ្មានសណ្តាប់ធ្នាប់ ហើយថែមទាំង បញ្ចេញនូវក្លិនដ៏សែនស្អុយជះមកបរិយាកាស ដែលធ្វើឲ្យពួកគាត់មិនអាចទ្រាំហិតក្លិនដ៏ស្អុយនេះ បាន ថាមិនតែមនុស្សចាស់ ឬក៏កូនក្មេងនោះទេ ។
ប្រភពព័ត៌មានពីប្រជាពលរដ្ឋដែលរស់នៅជិតកំនរសម្រាមនោះបានប្រាប់អ្នកព័ត៌មានវិទ្យា សាស្ត្រខ្មែរកាលពីថ្ងៃទី ៥ ខែ សីហា ឆ្នាំ ២០១១ ឲ្យដឹងថា៖ ជារៀងរាល់ថ្ងៃមានប្រជាពលរដ្ឋ ដែលរស់នៅក្បែរនោះ (ពីរ-បីផ្ទះប៉ុណ្ណោះ)បានយកសម្រាមស្អុយមកចោលនៅជិតផ្លូវកែងទី១នៃផ្លូវលេខ២ ដោយមិនគិតដល់បរិស្ថានសង្គម រឺប្រជាពលរដ្ឋរស់នៅជុំវិញនោះឡើយ។ តែនេះមិនមែនបញ្ហាចោទធំដុំទេ ប៉ុន្តែវាប៉ះពាល់ដល់សុខភាពរបស់ប្រជាពលរដ្ឋដែលរស់នៅជុំវិញដ៏ធំធេង ដែលរាជរដ្ឋាភិបាលកំពុងយកចិត្តទុកដាក់លើបញ្ហាសុខភាពប្រជាជន។បើត្រឹមតែសម្រាមធម្មតា វាមិនបង្កឲ្យប៉ះពាល់ដល់មជ្ឈដ្ឋានដែលរស់នៅក្បែរនោះទេ។ គាត់បានសង្កត់ធ្ងន់ទៅលើក្រុមអាជីវករ លក់ត្រីដែលតែងតែយកកាកសំណស់ សេសសល់របស់ពួកគាត់ មកចោលនៅទីនេះ ហើយកាក សំណល់ទាំងនោះសុទ្ធសឹងតែជារបស់ស្អុយ(អាចម៌ត្រី)។ ប្រភពដដែលបាននិយាយបន្តថា៖ កាលពីមុន កន្លែងលក់ត្រីនេះគេមានធុង សម្រាប់ដាក់សម្រាមត្រឹមត្រូវ ហើយយើងសង្កេតឃើញថា ពួកគាត់តែងតែយកសម្រាមទៅចោល នៅក្នុងធុង តែស្រាប់តែបច្ចុប្បន្ននេះមិនដឹងថាយ៉ាងណាទេ ស្រាប់តែពួកគាត់យកសម្រាមមកចោលនៅចំណុច ខាងលើនេះទៅវិញ ធុងសម្រាប់ដាក់សម្រាម គេទុកឲ្យពួកគាត់ចោលក្នុងធុង តែពួកគាត់មិន ចោលក្នុងធុងទៅវិញ បែរជាមកចោលពាស វាលពាសកាលធ្វើឲ្យខូចសណ្តាប់ធ្នាប់របស់សង្គមទៅវិញ មិនតែប៉ុណ្ណោះវាបានសាយភាយ នូវក្លិនដ៏ស្អុយជះមកបរិស្ថានទៀតផង ។ សូម្បីតែកូនក្មេង ទើបតែមានអាយុប្រមាណជា៤ទៅ៥ឆ្នាំ ដែលធ្លាប់តែធ្វើដំណើរឆ្លងកាត់នៅទីនេះដើម្បីទៅរៀន តែពេលនេះស្រាប់បាត់ស្រមោលក្មេងៗ ទាំងនេះ ទៅវិញនេះក៏ដោយសារតែមានក្លិនសាយភាយជះមក លើពួកគេនោះឯង ទើបពួក គេបញ្ឈប់ការធ្វើដំណើរឆ្លងកាត់តាមផ្លូវនេះ ។ ហើយកន្លងមកនេះពួកគាត់មិនដែលឃើញមាន អាជ្ញាធរណាមួយមកធ្វើការហាមប្រាមចំពោះអាជីវករដែលតែងតែយក កាកសំណល់មកនៅ ទីនេះទេ ឬក៏ពួកគាត់ទុកសម្រាមទាំងនេះសម្រាប់តាំងពិពណ៌ឬក៏បង្អូតភ្ងៀវទេសចរណ៍ជាតិ-អន្តរជាតិដែលគេមកធ្វើទេសចរណ៍នៅក្នុងខេត្តបន្ទាយមានជ័យរបស់យើង។ តែបើអាជ្ញាធរទុកសម្រាមទាំងនេះ សម្រាប់បង្អូតភ្ងៀវទេសចរណ៍ពិតមែននោះ ពួកគាត់នឹងនាំ គ្នាយកសម្រាមទៅចោលនៅកន្លែងនោះដែរ ។ ថ្វីត្បិតតែយើងឃើញកំនរសម្រាមនេះតិចក៏ពិតមែនតែវា មានឥទ្ធិពលធ្វើឲ្យប្រជា ពលរដ្ឋដែលរស់នៅក្បែរនោះឈឺចាប់ដោយសារវាមិនតិចនោះទេ។ ក្រោយវិទ្យាសាស្ត្រខ្មែរចេញផ្សាយ ប្រជាពលរដ្ឋមានក្តី សង្ឃឹមថា អាជ្ញាធរក៏ក្រុមហ៊ុនដឹកសម្រាម និងមានដំណោះស្រាយដ៏ល្អជូនពួកគាត់ជាមិនខាន ៕
ដោយ កុមារទេព

Read more »

Posted in: ព័ត៌មាន

ពន្ធនាគារខេត្តបន្ទាយមានជ័យក្រោមការដឹកនាំរបស់ប្រធានថ្មី

1:28 AM

No comments

បន្ទាយមានជ័យ៖ គ្រាន់តែចូលកាន់តំណែងភ្លាមគេសង្កេតឃើញលោក សាម នី និង លោក កែវ វិចិត្រ ប្រធាននិងអនុប្រធានពន្ធនាគារថ្មីប្រឹងប្រែងកែលំអពន្ធនាគារមិនឲ្យមានរឿងអាស្រូវដូចមុន គឺ ប្រមូលអ្នកទោសចូលបន្ទប់ឃុំឃាំងវិញទាំងអស់លុបបំបាត់ពាក្យថា អ្នកទោសមានតែឈ្មោះជាប់ឃុំ ឯមនុស្សដេកផ្ទះសំណាក់និងបន្តរកស៊ីខុសច្បាប់។ ចំណែកឯរឿងប្រើប្រាស់គ្រឿងញៀនក្នុងគុកក៏ ត្រូវលុបបំបាត់ទាំងស្រុងដែរ ដោយឡែកអ្នកទោសដែលរឹងរួសព្រោះអាងលុយ អាងបក្សពួកមិន គោរពវិន័យក្នុងពន្ធនាគារអប់រំមិនឡើងត្រូវបានបញ្ជូនទៅដាក់វិន័យនៅឯពន្ធនាគារខេត្តបាត់ដំបង។ ជាក់ស្តែងកាលពីថ្ងៃទី ៣ ខែ សីហា ឆ្នាំ ២០១១ ទណ្ឌិតក្បាលរឹងម្នាក់ឈ្មោះ ស្រេង វីរៈ ហៅ ល័ក្ខ ដែលជាប់ទោសពីបទ ជួញដូរគ្រឿងញៀន ហើយពេលជាប់គុករាប់ឆ្នាំទៅហើយ នៅតែមានសារ ធាតុគ្រឿងញៀនក្នុងទឹកម៉ូត្រ ពិនិត្យពីរ-បីដងមិនចេះអស់ ត្រូវបានបញ្ជូនទៅដាក់បន្ទប់ពិន័យនៅពន្ធ នាគារខេត្តបាត់ដំបង ។ គួររំលឹកថា ក្រោយពេលវិទ្យាសាស្ត្រខ្មែរចុះផ្សាយព័ត៌មានស្តីពីអ្នកទោស លួចប្រើប្រាស់គ្រឿងញៀនក្នុងគុករួចមក ថៃ្ងទី ១៨ ខែ មិថុនា ឆ្នាំ ២០១១ មន្ត្រីជំនាញក្រោមការ បញ្ជារបស់លោកប្រធានគណៈអភិបាលខេត្តបន្ទាយមានជ័យ បានចុះទៅត្រួតពិនិត្យទឹកនោមអ្នក ទោសដើម្បីរកសារធាតុគ្រឿងញៀន ។ ក្នុងចំណោមអ្នកទោសជាង១០នាក់ មាន៤នាក់ មានសារ ធាតុថ្នាំញៀនក្នុងខ្លួន ។ លុះដល់ថ្ងៃទី ៨ ខែ កក្កដា ឆ្នាំ ២០១១ មានការត្រួតពិនិត្យម្តងទៀតក៏នៅតែ ឃើញមានសារធាតុថ្នាំញៀនក្នុងខ្លួនអ្នកទោសបួននាក់នោះដដែល ។ ដោយសារមូលហេតុនេះ ហើយ ទើបមានការផ្លាស់ប្តូតំណែងប្រធានពន្ធនាគារខេត្ត បន្ទាយមានជ័យ កាលពីថ្ងៃទី ២៧ ខែ កក្កដា ឆ្នាំ ២០១១ដោយដកលោក ភាន ឆវន្ត ចេញដាក់ជំនួសដោយលោក សាម នី ។ ក្រោយផ្លាស់ ប្តូរប្រធានថ្មីហើយ មានមន្ត្រីខាងអង្គភាពប្រឆាំងអំពើពុករលួយចុះមកធ្វើអធិការកិច្ចក្នុងពន្ធនាគារ នេះទៀត។ រឿងដែលគួរឲ្យភ្ញាក់ផ្អើលនោះគឺថ្ងៃទីមួយមន្ត្រីបានហៅអ្នកទោសពីរនាក់ឈ្មោះ គឹម ហាន និង ស្រេង វីរៈ ហៅ ល័ក្ខ មកសួរ និងពិនិត្យទឹកម៉ូត្រ ។ ការពិនិត្យលើកដំបូងនេះ មិនឃើញ មានអ្វីទេ ។ ស្អែកឡើងមនុស្សដដែលពីរនាក់នេះក្រោយពីសាកសួររួចក៏ពិនិត្យទឹកនោមម្តងទៀត ស្រាប់តែឃើញមានសារធាតុញៀនក្នុងទឹកនោមសារជាថ្មី ។ ធ្វើឲ្យមានចង្ងល់ថា តើអ្នកណាជាអ្នក ជញ្ជូនថ្នាំញៀនឲ្យពួកគេប្រើប្រាស់ ? ។ មិនតែប៉ុណ្ណោះឈ្មោះ ល័ក្ខ និង បក្សពួក ពីរ-បីនាក់ទៀត ដែលធ្លាប់តែសប្បាយនិងការប្រើប្រាស់ថ្នាំញៀនដោយសេរីក្នុងពន្ធនាគារ ក្នុងជំនាន់មេគុកនួន វណ្ណា និង ភាន ឆវន្ត នោះ បានបំផុសអ្នកទោសឲ្យផ្តិតមេដៃទាមទារឲ្យមេចាស់គឺលោក ភាន ឆវន្ត បានវិល មកកាន់តំណែងវិញ ។ ដោយមើលឃើញថា បើទុកឈ្មោះ ល័ក្ខ នេះ តទៅទៀត នោះបញ្ហានិងកើត មានមិនចេះឈប់ឈរ ទើបអ្នកគ្រប់គ្រងថ្មីសម្រេចចិត្តបញ្ជូនឈ្មោះនេះទៅដាក់ពិន័យនៅពន្ធនាគារ ខេត្តបាត់ដំបងតែម្តងទៅ ។ សង្ឃឹមថា រឿងរ៉ាវអាស្រូវនិងបញ្ហារញ៉េរញ៉ៃដែលធ្លាប់មានពីមុនមកទាំង ប៉ុន្មាននិងដោយរោយទៅតាមមេគុកចាស់និងទណ្ឌិតឈ្មោះ ល័ក្ខ ទាំងអស់ កុំឲ្យនៅមានសេសសល់ តទៅទៀត ៕ ដោយ សិរីសោភ័ណ

Read more »

Posted in: ព័ត៌មាន

មន្ត្រីចារកិច្ចនៃអគ្គបញ្ជាការកងយុទ្ធពលខេមរៈភូមិន្ទសៀមរាប រងនូវការគំរាមកំហែងពីក្រុមឈ្មួញដឹកឈើ

1:27 AM

No comments

បន្ទាយមានជ័យ៖ មន្ត្រីចារកិច្ចនៃអគ្គបញ្ជាការកងយុទ្ធពលខេមរៈភូមិន្ទចំនួន៤នាក់ ប្រចាំខេត្តសៀមរាប ត្រូវបានក្រុមឈ្មួញរត់ពន្ធឈើខុសច្បាប់ប្រមាណ១០នាក់ បានប្រើអាវុធបាញ់ចំនួន៧គ្រាប់ ដើម្បីគំរាមសមត្ថកិច្ចមិនឲ្យធ្វើសកម្មភាពដេញតាមឡានដឹកឈើក្រញ៉ូងមួយគ្រឿង ដែលគ្រោងធ្វើដំណើរចូលទៅក្នុងទឹកដីខេត្តបន្ទាយមានជ័យ កាលពីយប់ថ្ងៃទី២ ខែកក្តដា ឆ្នាំ ២០១១។
ប្រភពព័ត៌មានពី អគ្គបញ្ជាការកងយុទ្ធពលខេមរៈភូមិន្ទខេត្តសៀមរាបបានប្រាប់វិទ្យាសាស្ត្រខ្មែរឲ្យដឹងថា៖ កាលថ្ងៃទី២ ខែសីហា ឆ្នាំ ២០១១ លោកបានទទួលដំណឹងអំពីករណីលួចរត់ពន្ធឈើក្រញ៉ូខុសច្បាប់ ក្រោយមកលោកបានរាយការណ៍តាមទូរសព្ទ័ទៅព្រះរាជអាជ្ញា ដើម្បីស្នើសុំការបង្គាប់បញ្ជារ ដេញតាមរថយន្តកូរ៉េមួយគ្រឿងទំងន់៥,៥តោន ពាក់ស្លាកលេខភ្នំពេញ ០២១៣ លាបព័ណ៌ក្បាលស ខ្លួនខៀវ ដោយធ្វើដំណើរចេញពីខេត្តឧត្តមានជ័យ ឆ្ពោះទៅកាន់ខេត្តបន្ទាយមានជ័យ។ ប្រភពដដែលបានបន្តថា ក្រោយមកក្រុមចារកិច្ចចំនួន៣នាក់ រួមទាំងលោកផងនោះ បានចេញប្រតិបត្តិការណ៍ភ្លាមតាមចាប់រថយន្តសង្ស័យមួយគ្រឿងនោះ ដើម្បីសុំធ្វើការឆែកឆេរ ប៉ុន្តែនៅក្នុងហេតុការណ៍នេះ បក្សពួកជនល្មើសបានបើកបររថយន្តចំនួនពីរគ្រឿងទៀត ម៉ាកតូយ៉ូតា និងម៉ាកបាឡែន ដោយ១គ្រឿងបានបើកគៀររថយន្តសមត្ថកិច្ច ហើយ១គ្រឿងទៀតបានបើកបុកគូទឡានសមត្ថកិច្ច ទើបបណ្តាលឲ្យមានការខូចខាត។
រថយន្តដឹកឈើខុសច្បាប់បានធ្វើដំណើរមកដល់ចំនុចកើតហេតុ ស្ថិតក្នុងភូមិរំដួល ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ ស្រាប់តែមានរថយន្តចំនួន៥គ្រឿងទៀតបានដាក់រាយប៉ាយពេញផ្លូវ ដើម្បីស្ទាក់ឡានសមត្ថកិច្ចមិនឲ្យបន្តសកម្មភាពដេញតាមឡានដឹកឈើក្រញ៉ូងទៀត។ មានបុរសម្នាក់បានចុះពីលើឡាន ហើយដកកាំភ្លើងបាញ់ឡើងលើចំនួន២គ្រាប់ បន្ទាប់មកឡើងជិះរថយន្តចេញទៅបាត់។ ប្រភពបានបន្ថែមទៀតថា៖បន្ទាប់ពីមានការផ្ទុះកាំភ្លើងចំនួន២គ្រាប់រួចមក ស្រាប់តែមានមនុស្សប្រហែល១០នាក់ទៀត បានចុះពីលើរថយន្តទាំង៥គ្រឿង ដើរសំដៅមករកសមត្ថកិច្ចពួកគាត់ តែមិនបានធ្វើអ្វីទេ ដោយដកកាំភ្លើងបាញ់បំបែកកងឡានចំនួន៥គ្រាប់ ហើយនាំគ្នាវៃរថយន្តសមត្ថកិច្ចបែកកញ្ចក់ខ្ទេចខ្ទីគ្មានសល់ បន្ទាប់មកពួកគេនាំគ្នាឡើងជិះរថយន្តគេចខ្លួនបាត់អស់ ព្រមទាំងដកយកទូរសព្ទ័ដៃរបស់គាត់ទៅជាមួយផងដែរ។សូមបញ្ជាក់ថា៖មិនមានសមត្ថកិច្ចណាម្នាក់បានរងគ្រោះនៅក្នុងហេតុការណ៍នេះទេ ប៉ុន្តែគ្រាន់តែមានការសោកស្តាយយ៉ាងខ្លាំងក្នុងហេតុការណ៍ ដោយសារតែសមត្ថកិច្ចមួយចំនួនមិនបានអើពើជួយអន្តរាគមន៍ដល់ពួកគាត់ ក្នុងករណីនេះ។ ក្រុមមន្ត្រីទាំងនោះបានថ្លែងបន្តថា៖ លោកនិងដាក់ពាក្យប្តឹងចូលទៅកាន់ស្នងការខេត្ត ដើម្បីឲ្យពួកគេមានវិធានការណ៍ក្នុងរឿងនេះបន្តទៀត៕
ដោយ កុមារទេព

Read more »

Posted in: ព័ត៌មាន

រវល់តែតម្រង់កញ្ចក់ម៉ូតូ មិនបានមើលមុខជ្រុលចង្កូតទៅបុករ៉ឺម៉កម៉ូតូ របួសធ្ងន់ម្នាក់ស្រាលម្នាក់

1:26 AM

No comments

បន្ទាយមានជ័យ៖ ឧបទ្វេវហេតុគ្រោះថ្នាក់ចរាចរណ៍មួយបានកើតឡើងរវាងម៉ូតូនិង រឺម៉កម៉ូតូហើយបានបណ្តាលឲ្យនារីម្នាក់រង របួសធ្ងន់ និងបុរសម្នាក់រងបួសស្រាល។ ហេតុការណ៍នេះបានកើតឡើងនៅវេលាម៉ោង១៦.៤០នាទី នាថ្ងៃទី៣ ខែ សីហា ឆ្នាំ ២០១១ នៅលើកំណាត់ផ្លូវជាតិ លេខ៦ ដែលស្ថិតចំណុចភូមិ ១ សង្កាត់ ព្រះពន្លា ក្រុង សិរីសោភ័ណ ខេត្ត បន្ទាយមានជ័យ ។
ប្រភពព័ត៌មានពីលោកអនុសេនីយឯក តោ សារូ នាយផ្នែកការរិយាល័យចរាចផ្លូវគោកនៃស្នងការដ្ឋាននគរបាលខេត្តបន្ទាយមានជ័យបានថ្លែងប្រាប់វិទ្យាសាស្ត្រខ្មែរឲ្យដឹងថា៖ជនរងគ្រោះមានពីរនាក់គឺ១. ឈ្មោះ ជីង ស្រីមុំ ភេទ ស្រី អាយុ ២៦ឆ្នាំ ជាអ្នកបើកបរ (មានពាក់មួកការពារសុវត្ថិភាព) បានរងនូវ របួសធ្ងន់ធ្ងរ ២.ឈ្មោះ ចិន ចាវ ភេទ ប្រុស អាយុ ១៥ឆ្នាំ ជាអ្នករួមដំណើរ បានរងរបួសស្រាល អ្នកទាំងពីររស់នៅក្នុងភូមិ កណ្តាល ឃុំ បុស្បូវ ស្រុក ព្រះនេត្រព្រះ ខេត្ត បន្ទាយមានជ័យដូចគ្នា ។ លោកបានថ្លែងបន្តឲ្យដឹងទៀតថា៖ មុនកើតហេតុនេះគេឃើញមានម៉ូតូមួយឌុបគ្នាដោយមនុស្សស្រី ជាអ្នកបើកបរហើយមានមនុស្សប្រុសជាអ្នករួមដំណើរស្របទិសគ្នាពីលិចទៅកើត លុះមកដល់ចំណុច កើតហេតុ គេ ឃើញស្រ្តីដែលជាអ្នកបើកបរនោះបានទាញកញ្ចក់ម៉ូតូតម្រង់គ្រាន់មើលក្រោយ តែ មិនបានមើលទៅមុខព្រោះ រវល់តែតម្រង់កញ្ចក់ណាមួយល្បឿនលឿនផង ក៏ជ្រុលចង្កូតទៅបុកម៉ូតូ រឺម៉កដែលនៅស្ងៀម ធ្វើឲ្យនារីអ្នកបើកបរ រងរបួសធ្ងន់និងបុរសរួមដំណើររបួសស្រាល។ ឯជនរង គ្រោះទាំងពីរនាក់ត្រូវបានរថយន្តនៃស្នងការដ្ឋាននគរបាលខេត្តបន្ទាយមានជ័យដឹកយកទៅព្យា បាលនៅមន្ទីរពេទ្យបង្អែកក្រុងសិរីសោភ័ណ ។ តាមសម្តីប៉ូលីសនិងគ្រូពេទ្យឲ្យ ដឹងឲ្យថា៖ ស្រ្តីរងគ្រោះកុំតែបានពាក់មួកការពារសុវត្ថិភាពកុំអីរឹតតែធ្ងន់់ជាងនេះទៅទៀត ៕
ដោយ មុនីរដ្ឋ

Read more »

Posted in: ព័ត៌មាន

វីហ្គោ ដុនបូស្តូ ក្រឡាប់ផ្ងាជើងឡើងលើនៅប៉ោយប៉ែត

5:48 PM

No comments

ប៉ោយប៉ែត៖ ឡានវីហ្គោ ពណ៌សពាក់ស្លាកលេខ ONG10 2-003 របស់អង្គការដុនបូស្តូបានក្រឡាប់ បៈជើងឡើងលើនៅចំណុចភូមិ គីឡូម៉ែតលេខ៤ សង្កាត់ ប៉ោយប៉ែត ក្រុង ប៉ោយប៉ែត ខេត្ត បន្ទាយមានជ័យ កាលពីរសៀលម៉ោង១៥ ថៃ្ងទី ៣១ ខែ កក្កដា ឆ្នាំ ២០១១ ប៉ុន្តែជនជាតិបរទេសពីរ នាក់នៅក្នុងឡានពុំមានគ្រោះថ្នាក់អ្វីទេ ។ សាក្សីដែលបានឃើញហេតុការណ៍នេះបាននិយាយថា៖ គេបានឃើញឡានអង្គការក្រៅរដ្ឋាភិបាលនេះបើកពីកើតទៅលិចដោយមានល្បឿនលឿនគួរសម ពេលមកដល់កន្លែងកើតហេតុស្រាប់តែឃើញឡានរេពេញថ្នល់ហើយឡើងទៅលើចិញ្ចើមថ្នល់រួច
ក្រឡាប់ផ្ងាជើងឡើងលើ។ បន្តិចក្រោយមកគេឃើញជនជាតិអាស៊ីជាបរទេសពីរនាក់លូនចេញពីក្នុង ឡានទាំងមុខស្លេកស្លាំង។ ភ្លាមៗនោះគេឃើញប៉ូលីសចរាចរណ៍ក្រុងប៉ោយប៉ែតទៅដល់កន្លែង កើតហេតុភ្លាមដែរ ។ តាមសម្តីប៉ូលីសចរាចរណ៍ដែលបានសាកសួរជនបរទេសជាអ្នកបើកបរនិងអ្នក រួមដំណើរពីរនាក់នោះនិយាយថា៖ ពេលកំពុងបើកបរស្រាប់តែមានឆ្កែមួយក្បាលរត់មុខដោយមិន ចង់បុកឆ្កែតៃកុងក៏បានបួងចង្កូតគេចហើយក៏ក្រឡាប់បៈជើងបែរក្បាលទៅទិសខាងកើតវិញអញ្ចឹង
ទៅ ។ ដោយជាគ្រោះថ្នាក់ឯកតោភាគីហើយគ្មានបណ្តាលគ្រោះថ្នាក់ដល់អ្នកដទៃប៉ូលីសបានអនុ ញាត្តឲ្យជនបរទេសពីរនាក់នោះយកឡានទៅជួសជុលវិញ ។ សូមជម្រាបថា ផ្លូវជាតិលេខ៥ ចាប់ពី ក្រុង ប៉ោយប៉ែត ទៅក្រុង សិរីសោភ័ណ ដែលជួសជុលដោយក្រុមហ៊ុនថៃ មួយឈ្មោះ ណាវ៉ារ៉ាត់ ដែលមានប្រវែងជាង៤០គីឡូម៉ែត្រ មានភាពរលោងស្រិលស្រួលក្នុងការធ្វើដំណើរ ជាហេតុអ្នកបើក បរយានយន្តតែងតែបើកបរក្នុងល្បឿនលឿនមិនខ្លាចគ្រោះថ្នាក់។ ដោយហេតុនេះហើយបានជា គ្រោះថ្នាក់ចរាចរណ៍លើកំណាត់ផ្លូវនេះ តែងកើតមានជារឿយៗ បណ្តាលឲ្យមានមនុស្សស្លាប់និង របួសអស់ជាច្រើននាក់រួចមកហើយ មានទាំងគ្រោះថ្នាក់ជាឯកតោភាគីនិង គ្រោះថ្នាក់បុកប៉ះគ្នាជា ដើម ៕ ដោយ ជិណ្ណារ៉ា

Read more »

Posted in: ព័ត៌មាន

M.N.R NEWSPAPER

Monirath Khmer Welcome

ព៍ត៌មានទាន់ហេតុការណ៍ៈ តើវាសនារបស់លោក គឹម ស្រួយ នាយកវិទ្យាល័យសម្តេចឪ បន្ទាយមានជ័យ ទៅជាយ៉ាងណា? "

នាយករដ្ឋមន្ត្រី ហ៊ុន សែន

សុខ អាន

វិប្បសារី

បែករហូត

សាយ័ណ្ណឯការ

ចំនួនអ្នកទស្សនា

ម៉ោង

Featured Posts

This is featured post 1 title

This is featured post 2 title

This is featured post 3 title

This is featured post 4 title

This is featured post 5 title

ផ្ទុះគ្រាប់បែកនៅប៉ោយប៉ែតបណ្ដាលឲ្យស្ត្រី២នាក់រងរបួស

ខៀវ សំផន៖ ហេតុអីតុលាការមិនកាត់ក្ដីព្រះមហាវីរក្សត្រ នរោត្ដម សីហនុ?

សិស្សសាលាជាង ១០០ នាក់បានដួលសន្លប់ភ្លាម

មេបញ្ជាការកងអង្គរក្សលោក ជា ស៊ីម ត្រូវចាប់ខ្លួន

ក្រុមយុវសិស្សសារទរចំពោះការចុះផ្សាយទង្វើរបស់លោក គឹម ស្រូយ នៃកាសែតវិទ្យាសាស្ត្រខ្មែរ

កំនរសម្រាមមួយកន្លែងកំពុងធ្វើប្រជាពលរដ្ឋឈឺក្បាល

ពន្ធនាគារខេត្តបន្ទាយមានជ័យក្រោមការដឹកនាំរបស់ប្រធានថ្មី

មន្ត្រីចារកិច្ចនៃអគ្គបញ្ជាការកងយុទ្ធពលខេមរៈភូមិន្ទសៀមរាប រងនូវការគំរាមកំហែងពីក្រុមឈ្មួញដឹកឈើ

រវល់តែតម្រង់កញ្ចក់ម៉ូតូ មិនបានមើលមុខជ្រុលចង្កូតទៅបុករ៉ឺម៉កម៉ូតូ របួសធ្ងន់ម្នាក់ស្រាលម្នាក់

វីហ្គោ ដុនបូស្តូ ក្រឡាប់ផ្ងាជើងឡើងលើនៅប៉ោយប៉ែត

ព័ត៌មាន