4:27 PM
ខណៈប្រតិភូកម្ពុជា និងថៃ កំពុងជួបតទល់គ្នានៅតុលាការអន្តរជាតិ ទីក្រុងឡាអេ ប្រទេសហុល្លង់ ដែលជាការឆ្លើយឆ្លងគ្នាអំពីបញ្ហាជម្លោះព្រំដែនខ្មែរ-ថៃ ពីថ្ងៃ៣០ ដល់ថ្ងៃ៣១ ឧសភា រដ្ឋមន្ត្រីការបរទេសថៃ បានលើកឡើងថា គេមានជំនឿលើតុលាការនេះ។
រដ្ឋមន្ត្រីការបរទេសថៃ បានលើកឡើងថា គេមានជំនឿលើវិជ្ជាជីវៈរបស់តុលាការអន្តរជាតិ និងថា ប្រទេសមហាអំណាចបច្ចុប្បន្ននេះនឹងមិនគាំទ្រកម្ពុជា ដូចកាលពីប្រទេសកម្ពុជា ទើបទទួលបានឯករាជ្យពីអាណានិគមបារាំងនោះទេ។
កាសែតបាងកក ប៉ុស្តិ៍ (Bangkok Post) របស់ថៃ នៅថ្ងៃទី១ មិថុនា បានស្រង់សម្ដីលោក កាស៊ីត ភិរម្យ (Kasit Piromya) រដ្ឋមន្ត្រីការបរទេសថៃ ដូច្នេះ នៅខណៈដែលភាគីកម្ពុជា និងថៃ បានជួបតទល់គ្នាបកស្រាយអំពីបញ្ហាជម្លោះព្រំដែនតំបន់ប្រាសាទ ព្រះវិហារ នៅចំពោះមុខតុលាការអន្តរជាតិ នៅទីក្រុងឡាអេ ប្រទេសហុល្លង់ ដែលភាគីទាំងពីរចោទប្រកាន់គ្នាទៅវិញទៅមកអំពីការផ្ទុះអាវុធ។
ទោះជាយ៉ាងនេះក្ដី អ្នកវិភាគឯករាជ្យ និងជាអ្នកតាមឃ្លាំមើលស្ថានការណ៍ជម្លោះខ្មែរ-ថៃ លោកបណ្ឌិត សុខ ទូច បានពន្យល់ថា រដ្ឋមន្ត្រីការបរទេសរបស់ថៃ បានលើកឡើងនេះ គ្រាន់តែជាការទាក់ទាញយកសំឡេងគាំទ្រប្រជាពលរដ្ឋរបស់ខ្លួន ដើម្បីគាំទ្ររដ្ឋាភិបាលថៃ តែប៉ុណ្ណោះ តែបើយោងលើផ្លូវច្បាប់ គឺកម្ពុជាមានអាទិភាពជាងថៃ។
សេចក្ដីប្រកាសព័ត៌មានក្រៅផ្លូវការតុលាការអន្តរជាតិ (ICJ) ចេញផ្សាយនៅលើគេហទំព័ររបស់ខ្លួនកាលពីថ្ងៃទី៣១ ឧសភា បានសរសេរថា កម្ពុជាស្នើទៅតុលាការនូវវិធានការ ៣ ក្រៅការស្នើឲ្យតុលាការបកស្រាយសាលក្រមឆ្នាំ១៩៦២ នោះ រួមមានស្នើឲ្យដកទ័ពថៃ ដោយគ្មានលក្ខខណ្ឌចេញពីទឹកដីកម្ពុជា នៅតំបន់ប្រាសាទព្រះវិហារ ហាមឃាត់រាល់សកម្មភាពយោធារបស់ថៃ នៅតំបន់ប្រាសាទព្រះវិហារ និងស្នើឲ្យថៃ បញ្ឈប់ជាបន្ទាន់នូវរាល់សកម្មភាពណាមួយដែលអាចជ្រៀតជ្រែកដល់សិទ្ធិ កម្ពុជា ឬក៏អាចធ្វើឲ្យមានស្ថានការណ៍ជម្លោះធ្ងន់ធ្ងរនៅក្នុងដំណើរការរបស់ តុលាការ។
រីឯភាគីថៃវិញ នៅក្នុងសេចក្ដីប្រកាសព័ត៌មានបានបញ្ជាក់ថា ឯកអគ្គរាជទូតថៃ នៅទីក្រុងឡាអេ ប្រទេសហុល្លង់ លោក វីរឆ័យ ផ្លាសៃ (Virachai Plasai) បានទាមទារឲ្យតុលាការដកករណីបកស្រាយសាលក្រមឆ្នាំ១៩៦២ ចេញពីបញ្ជីទូទៅរបស់តុលាការ ដែលកម្ពុជាបានប្ដឹងកាលពីថ្ងៃទី២៨ មេសា ឆ្នាំ២០១១ ដោយយោងលើមាត្រា៦០ នៃវិធានរបស់តុលាការ។
មន្ត្រីនាំពាក្យក្រសួងការបរទេសកម្ពុជា លោក កុយ គួង បានបញ្ជាក់ថា លោកមិនទាន់ទទួលបានព័ត៌មានណាមួយពីគណៈប្រតិភូកម្ពុជា នៅទីក្រុងឡាអេ នៅឡើយទេ មកទល់ថ្ងៃទី១ មិថុនា។ ប៉ុន្តែលោក កុយ គួង បានឲ្យដឹងថា លោកឧបនាយករដ្ឋមន្ត្រី ហោ ណាំហុង និងគណៈប្រតិភូកម្ពុជា នឹងវិលត្រឡប់មកកម្ពុជាវិញនៅព្រឹកថ្ងៃទី២ មិថុនា។
ទាក់ទងទៅនឹងបញ្ហាជម្លោះខ្មែរ-ថៃនេះ កាសែតបាងកក ប៉ុស្តិ៍ នៅថ្ងៃទី១ មិថុនា បានសរសេរថា នាយករដ្ឋមន្ត្រីថៃ និងរដ្ឋមន្ត្រីការបរទេសថៃ លោក កាស៊ីត ភិរម្យ បានថ្កោលទោសអតីតនាយករដ្ឋមន្ត្រីថៃ លោក ថាក់ស៊ីន ដោយតម្រូវឲ្យលោក ថាក់ស៊ីន សុំទោសប្រជាពលរដ្ឋថៃ បន្ទាប់ពីលោក ថាក់ស៊ីន បាននិយាយតាមបណ្ដាញសារព័ត៌មានសិង្ហបុរី ថា ថៃជាអ្នកបង្កជម្លោះ ហើយឈ្លានពានចូលទឹកដីកម្ពុជា។
នៅក្នុងសេចក្ដីព័ត៌មានរបស់តុលាការអន្តរជាតិដដែលបានបញ្ជាក់ថា ការសម្រេចណាមួយរបស់តុលាការគេនឹងប្រកាសជាសាធារណៈនៅពេលខាងមុខ ប៉ុន្តែមិនបានបញ្ជាក់កាលបរិច្ឆេទជាក់លាក់ណាមួយនៅឡើយទេ៕
Posted in: ព័ត៌មាន
0 comments:
Post a Comment