6:39 AM
អង្គការ-សមាគមមិនមែនរដ្ឋាភិបាល និងសហជីពកម្ពុជា ១៩៤ បានចេញសេចក្ដីថ្លែងការណ៍រួមគ្នានៅថ្ងៃទី៣០ ឧសភា ថ្កោលទោសគណៈកម្មការការពាររាជាណាចក្រថៃ ដែលសេចក្ដីថ្លែងការណ៍បានហៅថា ជាក្រុមជ្រុលនិយម ញុះញង់កងទ័ពថៃ ឲ្យឈ្លានពានប្រទេសជិតខាង ពិសេសប្រទេសកម្ពុជា។
ប្រធានអង្គការសង្គមស៊ីវិលអាស៊ាន លោក សួង ហួត តំណាងឲ្យអង្គការ សមាគម ១៩៤ បានមានប្រសាសន៍នៅថ្ងៃទី៣០ ឧសភា ថា លិខិតរបស់គណៈកម្មការការពាររាជាណាចក្រថៃ ឬហៅថា បណ្ដាញក្រុមអាវលឿងបានលើកឡើងនោះ គឺមិនឆ្លុះបញ្ចាំងអំពីការពិតទេ ៖ «ទី១ យើងជាប្រជាពលរដ្ឋខ្មែរ យើងស្រឡាញ់ទឹកដីខ្មែរ កាលណាគេទាមទារឲ្យដកទ័ពចេញពីទឹកដីយើង អានេះជាការឈ្លានពានទឹកដីកម្ពុជា ពេញទីហើយ។ ក្នុងនាមអង្គការសង្គមស៊ីវិល យើងមិនអាចនៅស្ងៀមបានទេ»។
ការបញ្ចេញប្រតិកម្មរបស់អង្គការសង្គមស៊ីវិលកម្ពុជានេះ នៅបន្ទាប់ពីក្រុមអាវលឿងថៃ បានដាក់សំណើទៅរដ្ឋាភិបាលថៃ ឲ្យអនុវត្តនូវបីចំណុច ដែលគេបានចុះផ្សាយនៅបណ្ដាញព័ត៌មាន ASTV manager online កាលពីថ្ងៃទី២៦ ឧសភា ឆ្នាំ២០១១។
ករណីដែលគេស្នើឡើងនោះ រួមមានការទាមទារឲ្យរដ្ឋាភិបាលថៃ លុបអនុស្សរណៈ (MOU) ឆ្នាំ២០០០ ស្ដីពីការបោះបង្គោលព្រំដែនកម្ពុជា-ថៃ ដែលពួកគេបានលើកឡើងថា ដើម្បីបញ្ចប់នូវការចាញ់ប្រៀបទាំងឡាយដែលកម្ពុជា ជាភាគីរំលោភ និងឈ្លានពានទឹកដីថៃ រហូតមក។ ទាមទារឲ្យរដ្ឋាភិបាលថៃ ដកខ្លួនពីអនុសញ្ញាបេតិកភណ្ឌពិភពលោក ដើម្បីបង្ហាញពីការតវ៉ា និងមិនទទួលស្គាល់កិច្ចដំណើរការរបស់ប្រទេសកម្ពុជា និងទាមទារឲ្យរដ្ឋាភិបាលថៃ រុញច្រានទាហាន និងទីប្រជុំជនកម្ពុជា ដែលពួកគេអះអាងថា កម្ពុជាជាអ្នកឈ្លានពាន និងដណ្ដើមកាន់កាប់ទឹកដីថៃ និងទាមទារយកទឹកដីថៃមកវិញ។
នៅក្នុងសេចក្ដីថ្លែងការណ៍របស់អង្គការសង្គមស៊ីវិលកម្ពុជា បានចុះថ្ងៃទី៣០ ឧសភា បានសរសេរថា ការលើកឡើងរបស់ក្រុមអាវលឿងថៃនេះ គឺឆ្លុះបញ្ចាំងអំពីមហិច្ឆតាឈ្លានពានរបស់ថៃ។
សេចក្ដីថ្លែងការណ៍ដដែលបានបញ្ជាក់ទៀតថា ការទាមទាររបស់ក្រុមអាវលឿងថៃនេះ គឺផ្ទុយទៅនឹងការលើកឡើងរបស់នាយករដ្ឋមន្ត្រីចាំផ្ទះថៃ លោក អាភីស៊ិត វេតឆាឈីវ៉ាក់ (Abhisit Vejjajiva) ដែលថា ថៃគ្មានបាត់បង់ទឹកដីទេ។
ទោះជាយ៉ាងណា អ្នកវិភាគឯករាជ្យដែលបានឃ្លាំមើលស្ថានការណ៍ជម្លោះខ្មែរ-ថៃនោះ បានពន្យល់ថា ការលើកឡើងរបស់ថៃនេះ ពុំមានផលប៉ះពាល់អ្វីដល់កម្ពុជាទេ ពិសេសទៅទៀតនោះ ពុំអាចកែប្រែនូវសាលដីកាឆ្នាំ១៩៦២ ដែលជាសាលដីការបស់តុលាការអន្តរជាតិនោះបានទេ ៖ «យើងក្ដី ហើយប្រទេសបារាំងក្ដី គឺសំអាងលើព្រំប្រទល់ដែនប្រទេសកម្ពុជា គឺសន្ធិសញ្ញាប្រទេសសៀម គឺសន្ធិសញ្ញា ១០០ឆ្នាំមុននោះ»។
ការបញ្ចេញប្រតិកម្មរបស់អង្គការសមាគម ខ្មែរ ឆ្លើយតបទៅចំពោះក្រុមអាវលឿងថៃនេះ នៅខណៈដែលប្រតិភូកម្ពុជា និងប្រតិភូថៃ កំពុងជួបគ្នានៅតុលាការអន្តរជាតិ នៅទីក្រុងឡាអេ ដើម្បីតទល់ ទាក់ទងទៅនឹងសាលដីកាឆ្នាំ១៩៦២ និងជំរុញឲ្យតុលាការនេះបកស្រាយសាលដីកានេះឡើងវិញ ដែលគេចាប់ផ្ដើមនៅថ្ងៃទី៣០ និងថ្ងៃ៣១ ឧសភា។
សារព័ត៌មានម៉ាឡេស៊ី The bernama នៅថ្ងៃទី៣០ ឧសភា បានស្រង់សម្ដីអនុនាយករដ្ឋមន្ត្រីម៉ាឡេស៊ី លោក តាន់ សារីមូហៃយីឌីន យ៉ាស៊ីន (Tan Sri Muhyiddin Yassin) បានសាទរចំពោះភាគីកម្ពុជា និងថៃ ដែលបានយកបញ្ហាជម្លោះព្រំដែននេះទៅដោះស្រាយនៅតុលាការអន្តរជាតិដែល លោកសង្ឃឹមថា នឹងធ្វើឲ្យបញ្ហាជម្លោះព្រំដែននៃប្រទេសទាំងពីរឈានទៅរកសន្តិភាព បាន៕
Posted in: ព័ត៌មាន
0 comments:
Post a Comment